NyumbaLinkTZ
Pakua app
Huduma Kwa wenye mali Jinsi inavyofanya kazi Usalama Maswali Pakua app kwenye Google Play
Kisheria

Sera ya Faragha

Data tunayokusanya, tunavyoitumia, nani anaiona, na haki zako.

Sera ya Faragha

Imesasishwa mwisho: 27 Oktoba 2026

NyumbaLink TZ ("app", "sisi") ni jukwaa la kutafuta na kutangaza nyumba, viwanja na miradi ya viwanja Tanzania, pamoja na zana za usimamizi wa wapangaji kwa wenye nyumba, mawakala na wenye miradi. Sera hii inaeleza data tunayokusanya, tunavyoitumia, nani anaiona, na haki zako.

1. Data tunayokusanya

  • Taarifa za akaunti: jina, jina la mtumiaji (@username, linaonekana kwenye wasifu wako wa umma), barua pepe, namba ya simu (hiari), picha ya wasifu, aina ya akaunti na lugha unayopendelea.
  • Maudhui unayoweka: matangazo ya nyumba na viwanja (picha, video, maelezo, bei na eneo/koodineti za tangazo), miradi ya viwanja, posts, reviews, comments na ujumbe wa chat.
  • Mahali ulipo: ukiruhusu, app inatumia mahali ulipo kuonyesha matangazo yaliyo karibu nawe, kuweka ramani mahali ulipo, kupima umbali na kutoa maelekezo. Hatuhifadhi mahali ulipo kwenye seva zetu. App inakumbuka sehemu ya mwisho ya ramani uliyoangalia, na utafutaji wako wa karibuni, kwenye simu yako tu.
  • Matumizi ya app: matangazo na miradi unayofungua (na ulipoyaona: ramani, orodha au ukurasa wa mwanzo), unaposhiriki (share), vichujio unavyotumia, kama utafutaji wa eneo ulipata matokeo, na unapofungua ramani pamoja na eneo la takriban (karibu km 5). Tunahifadhi haya kama jumla za kila siku. Maneno unayoandika kwenye utafutaji hatuyahifadhi. Tunatumia namba ya akaunti yako tu kuhesabu kila mtu mara moja kwa siku.
  • Maombi ya mawasiliano: ukibonyeza "Onyesha namba", piga au WhatsApp kwenye tangazo au wasifu, tunarekodi kuwa umeomba (akaunti yako, tangazo au akaunti husika, na muda) ili kuweka kikomo cha kila siku na kuzuia uvunaji wa namba za simu. Mwenye tangazo anaona idadi ya walioomba tu, si majina yao.
  • Utafutaji uliohifadhiwa: vichujio na eneo unalohifadhi, ili tukujulishe matangazo mapya yanayolingana nayo.
  • Ripoti na watu uliowazuia: ukiripoti tangazo, maoni au mtu, tunahifadhi ripoti yako (sababu, maelezo uliyoandika, na kama ilitoka kwenye chat au wasifu) ili admin aikague. Anayeripotiwa haambiwi nani aliripoti, na ujumbe wa chat haunakiliwi kwenye ripoti. Orodha ya watu uliowazuia inaonekana kwako tu, na aliyezuiwa haambiwi.
  • Kumbukumbu za usimamizi: wenye nyumba na mawakala wanaweza kuweka kumbukumbu za wapangaji, mikataba, malipo ya kodi na matengenezo; wenye miradi wanaweza kuweka kumbukumbu za viwanja vilivyohifadhiwa na malipo ya awamu (pamoja na jina na simu ya mnunuzi). Zinaonekana kwa aliyeziweka na, panapohusika, kwa mpangaji aliyeunganishwa.
  • Usajili kupitia wakala: wakala wa NyumbaLink akisajili nyumba yako kwa niaba yako, anarekodi jina lako, namba yako ya simu na mahali halisi pa nyumba. Namba yako na mahali halisi vinabaki siri; ramani ya umma inaonyesha eneo la takriban na jina lililofupishwa.
  • Uthibitisho (KYC) na nyaraka: watangazaji wanaoomba beji ya uthibitisho wanaweza kuwasilisha namba ya NIDA au ya pasipoti (pamoja na picha yake na selfie ukiwa umekishika kitambulisho), au leseni ya biashara; wenye miradi wanaweza kupakia nyaraka za umiliki (mf. hati, ramani ya upimaji). Hukaguliwa na admin pekee.
  • Data ya kiufundi: token ya arifa (push notifications), ripoti za hitilafu (crash reports), taarifa za msingi za kifaa kwa ajili ya kuboresha huduma, na namba ya utambulisho ya usakinishaji wa app (install ID). Namba hiyo hutengenezwa na app yenyewe bila mpangilio, si namba ya simu yako wala ya kifaa (IMEI), na tunaitumia tu kuzuia mtu mmoja kuchukua muda wa majaribio bure mara nyingi.
  • Malipo ya huduma za NyumbaLink: ukilipia huduma ya NyumbaLink (kwa mfano dashibodi ya mwenye nyumba, kufungua mawasiliano ya nyumba au Area Pass), tunahifadhi oda, kiasi, namba ya simu au jina la akaunti uliyolipia, namba ya muamala (transaction ID), muda wa malipo, na nyumba ulizofungua au pass uliyonayo. Malipo hufanyika kwa pesa za simu au benki, nje ya app. Hatukusanyi namba za kadi wala PIN.
  • Mapato ya mawakala: kwa NyumbaLink Agents, tunahifadhi mapato yao, namba ya pesa za simu na jina wanalotaka walipwe kwalo, na kumbukumbu za kila malipo tuliyowafanyia.

Kodi ya nyumba na malipo ya viwanja kati ya watumiaji hayapiti kwetu: app haipokei wala kushika pesa hizo, na kumbukumbu zake ni maandishi yanayowekwa na kuthibitishwa na mwenye nyumba au mwenye mradi.

2. Tunavyotumia data

  • Kuendesha huduma: kuonyesha matangazo na ramani, kuunganisha wapangaji na wanunuzi na wenye nyumba au miradi, chats na arifa.
  • Kukujulisha matangazo mapya yanayolingana na utafutaji uliohifadhi, na kuwakumbusha wenye matangazo kuthibitisha kuwa tangazo bado linapatikana.
  • Kuwaonyesha wenye matangazo na miradi jinsi yanavyofanya, kwa idadi tu (waliofungua, walioomba namba, walioshiriki).
  • Kuelewa mahitaji ya soko na kuboresha app, kwa takwimu za jumla.
  • Kuthibitisha akaunti (barua pepe ya uthibitisho) na beji za watangazaji (KYC).
  • Kuthibitisha malipo ya huduma, kukupa huduma uliyolipia, kuwalipa mawakala sehemu yao, na kutunza hesabu zinazotakiwa na sheria za kodi.
  • Usalama: kuzuia matumizi mabaya, udanganyifu, spam, uvunaji wa namba za simu na matumizi mabaya ya muda wa majaribio bure.
  • Kurekebisha hitilafu kupitia ripoti za hitilafu.

Hatuuzi data yako kwa mtu yeyote. App haina matangazo ya biashara wala zana za ufuatiliaji za makampuni mengine (third-party analytics au trackers).

3. Watoa huduma tunaowatumia

  • Google Firebase: akaunti (Authentication), hifadhidata (Cloud Firestore) na huduma za seva (Cloud Functions). Data huhifadhiwa kwenye seva za Google.
  • Cloudinary: kuhifadhi picha, video na nyaraka zinazopakiwa.
  • Resend: kutuma barua pepe za mfumo (mf. uthibitisho wa akaunti) kutoka no-reply@nyumbalinktz.com.
  • Expo: kutuma arifa (push notifications) na masasisho ya app.
  • OpenStreetMap / Nominatim / OSRM: ramani, utafutaji wa maeneo, kutafsiri koodineti kuwa anwani (geocoding) na kukokotoa njia (maelekezo). Koodineti za eneo la tangazo, maandishi unayotafuta, na unapoomba maelekezo, mahali pa kuanzia na unakoenda (ikiwemo mahali ulipo ukichagua hivyo) hutumwa kwa huduma hizi ili kupata matokeo. Hatuhifadhi mahali ulipo kwa ajili ya maelekezo.
  • Google Sign-In: ukichagua kuingia kwa Google, tunapokea jina, barua pepe na picha ya wasifu kutoka Google.

Watoa huduma hawa wanachakata data kwa niaba yetu tu, kwa mujibu wa mikataba na sera zao za faragha.

4. Data inayoonekana kwa wengine

  • Matangazo na miradi (pamoja na eneo, picha, bei na jina la mtangazaji) yanaonekana hadharani ndani ya app.
  • Namba ya simu na barua pepe ya mwenye tangazo hazionyeshwi hadharani. Namba hutolewa kwa mtumiaji aliyeingia na aliyethibitisha barua pepe anayeiomba, moja kwa wakati, kwa kikomo cha kila siku.
  • Wasifu wako wa umma: jina, picha, aina ya akaunti, beji, ukadiriaji, idadi ya wafuasi, jina la kampuni (kwa mashirika), na kama uko mtandaoni au ulionekana lini mara ya mwisho (unaweza kuficha hili: Mipangilio → Onyesha nikiwa mtandaoni). Namba yako ya simu na barua pepe hazimo kwenye wasifu wa umma.
  • Ujumbe wa chat unaonekana kwa washiriki wa mazungumzo husika tu. Admin hawezi kuusoma; anaona idadi ya mazungumzo na ujumbe tu.
  • Uliza Wakazi (ukijiunga mwenyewe kama mpangaji): anayeuliza anaona eneo lako (kwa mfano Gongolamboto), kwamba wewe ni mpangaji aliyethibitishwa, muda uliokaa kwa makundi (kama miezi 6–12) na majibu yako, chini ya namba ya mkazi ("Mkazi #7"). Jina lako, namba ya simu na nyumba yako hazionyeshwi. Swali la mtafutaji linawafikia wakazi bila jina lake. Unaweza kuacha wakati wowote. Ukihama, rekodi yako ya mkazi inafutwa; ukifuta akaunti, maswali na majibu yako yanafutwa pia.
  • Namba za NIDA, pasipoti au leseni na nyaraka za umiliki haziangaliwi na umma kamwe, ni admin wa uthibitisho pekee. Wanunuzi wanaona tu aina za nyaraka zilizothibitishwa.

5. Usalama

Data yote husafirishwa kwa muunganiko uliosimbwa (HTTPS/TLS). Upatikanaji wa hifadhidata unadhibitiwa na sheria za usalama (security rules) zinazobana kila mtumiaji kwenye data yake. Namba za simu za wenye matangazo zinahifadhiwa mbali na matangazo ya umma na kutolewa tu kupitia ombi linalorekodiwa. Nywila zako zinahifadhiwa na Firebase Authentication; hatuzioni wala kuzihifadhi sisi.

6. Kufuta akaunti na data

Unaweza kufuta akaunti yako moja kwa moja ndani ya app: Mipangilio (Settings) → Akaunti → Futa Akaunti. Hii inafuta mara moja akaunti yako ya kuingia na data zako: wasifu (pamoja na wasifu wa umma), matangazo, miradi, kumbukumbu, utafutaji uliohifadhiwa, kumbukumbu za maombi ya namba, ripoti ulizotuma na orodha ya uliowazuia. Ripoti kuhusu akaunti yako zinafutwa pia. Kwenye chats, jina na picha yako vinaondolewa; ujumbe uliotuma unabaki kwa mtu uliyekuwa ukiongea naye kama kumbukumbu yake, ukiandikwa "Akaunti imefutwa", na hakuna anayeweza kuendelea kuandika kwenye mazungumzo hayo. Maelezo kamili: nyumbalinktz.com/delete-account.

Kumbukumbu za malipo ya huduma na za mapato ya mawakala (oda, kiasi, namba za muamala, nyumba zilizofunguliwa) hazifutwi pamoja na akaunti. Tunazibakiza kwa muda unaotakiwa na sheria za kodi, kwa kawaida miaka 5.

Picha na nyaraka ulizopakia zinaondoka kwenye app mara moja. Mafaili yenyewe yanahifadhiwa na Cloudinary; ukitaka yafutwe huko pia, tuandikie kwenye anwani iliyo hapa chini nasi tutayafuta ndani ya siku 30.

Baada ya kufuta, tunabakiza kumbukumbu fupi kuwa akaunti ilifutwa (bila jina, barua pepe, simu wala maudhui) kwa hadi siku 180. Admin akiondoa akaunti kwa sababu ya matumizi mabaya, kumbukumbu hiyo inabeba pia misimbo ya njia moja (hash) ya barua pepe na simu ili mtu huyo atambulike akijisajili tena. Takwimu za matumizi zinabaki kama jumla za kila siku zisizokutambulisha.

7. Watoto

Huduma hii haielekezwi kwa watu chini ya miaka 18.

8. Mabadiliko ya sera

Tukibadilisha sera hii, tutasasisha tarehe iliyo juu na, kwa mabadiliko makubwa, kutoa taarifa ndani ya app.

9. Wasiliana nasi

Maswali ya faragha au maombi ya data: weisikosilvester@gmail.com